خليك أناني، ربنا يكرمك والناس تشكرك

تعرف انا ليه مستمر في الكتابة رغم انها بتاخد وقت ومجهود؟

لاني اخترت من الاول السبب اللي بكتب عشانه.. السبب هو أنا.

كل حاجة استمريت والتزمت بيها طول السنين اللي فاتت كنت بعملها عشاني أنا. كتير بيشوفوا ان ده انانيه، بس الحقيقة عكس كده.الحقيقة ان فيه اكتر من ٧٠ مقال ومحتوي تعليمي متنوع. في ناس كتير بيستفيدوا منه بفضل الله وبيبعتولي رسائل شكر. فيه اكتر من ١٢ الف شخص قرر يشترك في حسابي هنا للقراءة.

انا ممتن وسعيد بالنتيجة وحقيقي لم اتوقعها اطلاقاً.

مش بضر حد بالعكس الناس بتستفيد. لسه شايف ان ده أنانية؟

الدرس المستفاد هو انك كل ما تعمل حاجه بتحبها وبتعملها عشانك انت، بيكون الدافع المحفز داخلي ونابع من الفعل نفسه وليس النتيجة.. والنتيجة؟ انت بتتعلم، مهاراتك بتطور، قيمتك بتزيد.. يعني نجاح. النجاح ده بيترجم بعدين لأرقام، وطلب علي خدماتك. كل ده عشان انت بتعمل حاجة انت عايزها لمجرد انك عايزها

هو ده الأساس. أنت. كل شئ حققته وهتحققه في حياتك هتسيبه في الآخر هتروح لربنا لوحدك، بآخر نسخة وصلتلها من نفسك. العمل الحقيقي هو العمل اللي بتزكي بيه نفسك وبترقيها بيه. هو ده المدخل اللي بيخليك تنجح من جوه الاول عشان تشوف اثر النجاح الشخصي ده بعدين وهو بينعكس علي باقي جوانب حياتك

المدخل هو انت بصفر توقعات لآي نتيجة اخري

ليه بقول الكلام ده؟

لان في شخص ما دلوقتي نفسه يعمل حاجه وخايف ما يكملش فيها، خايف الناس ترفضها، خايف ما يوصلش بيها للنتيجة اللي متوقعها. لو انت هذا الشخص جه الوقت اللي تختار فيه نفسك، وتعمل اللي انت عايزه عشان نفسك، عشان انت حابب تشوف نفسك بتعمله. اعمل ده وانت املك عمره ما هيخيب. اعمل ده عشان انت هتبقي كل يوم افضل من امبارح وانت بتعمل حاجه بتحبها. اختار نفسك. خليك أناني،. ربنا هيكرمك والناس هتشكرك

اخيرا، في فترة كنت انشغلت جامد وتوقفت عن الكتابه وفتحت الجورنال بتاعي عشان اعبر عن شعوري وكتبت كام جمله حابب اشاركهم معاك عشان تشوف معني الأنانية اللي اقصده بين السطور.

انا وحشني جدا الوقت اللي بقضيه مع نفسي وانا بكتب، وانا بشوف نفسي في” الحروف وانا بلمس احلامي مع كل ضغطة زر علي لوحة المفاتيح. وحشني جدا الوقت اللي بشوف فيه جزء مني بيتكلم ويعبر كما لو انه بيعمل ده لأول مره. انا بكتب عشان انا عايز اكتب مش عشان الناس تقرأ كلامي وتحبه وتتفاعل معاه.”

ده كل اللي حبيت اشاركه معاك لحد ما نلتقي في مقال جديد ان شاء الله