كيف تعبر وتُفصح عن ذاتك
الناس هتحترمك لما تتكلم عن انجازاتك وهتحبك لما تتكلم عن فشلك
تخيل إنك في قعدة مع ناس، عندك كلام كتير جواك بس مش عارف تطلّعه، بتحاول تتكلم بس التردد والخوف بيمنعوك، أو الأسوأ… انك تكون شايف ان رأيك مش مهم اصلا! الإحساس ده بيحصل لناس كتير، وبيخليهم يحسوا إنهم متجاهلين، مش مفهومين، أو حتى وجودهم غير فارق.
لما متعرفش تعبر عن نفسك، الدنيا بتسرقك.
في الشغل، ممكن تعبك يروح لشخص تاني لأنه عرف يوضّح شغله أكتر منك. في العلاقات، ممكن تفضل ساكت على حاجات مضايقاك، وتوصل لمرحلة إنك تنفجر أو تزهق وتبعد. في الاهداف الشخصية، ممكن تشتغل كتير على نفسك وتبقى شاطر جدا فى مجالك لكن خجلك وخوفك من الظهور يضيعوا عليك فرص كتير كان ممكن تكون من نصيبك، ده ممكن يخليك تشعر بالظلم بس الحقيقة ان انت عندك حاجة ناقصة وهى مهارة الإفصاح عن الذات.
لو فضلت خايف تعبر عن نفسك و رافض تتفاعل اكتر مع الناس مش بس هتنفصل عن العالم تدريجيا لكن كمان افكارك اللى مش بتخرج للنور هتتحول لسلاح ضدك والخوف هيتحكم فيك بزيادة ومع الوقت مش هتكون قادر حتي تفهم نفسك!
في المقال ده هكشفلك الأسباب اللى بتخلينا مش قادرين نتكلم ونعبر عن نفسنا، بعدين هقدملك الطرق اللى هتساعدك تتكلم بثقة وتعبر عن نفسك لدرجة انك ممكن تستغرب انت ازاي كنت مخبي كل ده جواك طول السنين اللى فاتت، واحتمال تندم علي حجم الفرص اللى ضاعت بس الاكيد انه لسه قدامك فرص اكتر واكبر.
أسباب تمنعك من التعبير عن نفسك
أكيد في أوقات بتحس إنك عايز تقول حاجة، بس بتتراجع في آخر لحظة. الموضوع مش إنك مش عايز تتكلم، لكن فيه حاجات جواك بتخليك تفضل السكوت بدل ما تعبر عن اللي جواك. ممكن يكون واحد أو أكتر من الأسباب دي هو اللي موقفك:
مش عارف إيه اللي ممكن تقوله وإيه اللي تفضل ساكته عنه: ساعات بتبقى متردد، خايف تقول حاجة وبعدها تندم، أو تحس إنك شاركت تفاصيل ملهاش لازمة. فتفضل إنك تسكت أحسن ما تحط نفسك في موقف محرج.
حاسس إن مفيش فايدة من إنك تتكلم أصلاً بتسأل نفسك: "طب وبعدين؟ هيحصل إيه لو قلت اللي جوايا؟" ولو مش شايف أي نتيجة تستاهل، فبتقرر تحتفظ بكل حاجة لنفسك وخلاص.
عدم الثقة بالنفس.. خايف الناس تعرف حقيقتك: ممكن يكون عندك إحساس إنك لو عبرت عن نفسك، الناس هتشوف حاجات فيك كنت مخبيها، وساعتها ممكن تحكم عليك أو تبعد عنك. فبتفضل تحتفظ بجزء منك لنفسك علشان متتحطش في الموقف ده.
المثالية.. مش عايز تبان ضعيف قدام حد: يمكن متعود تبان قوي، متحكم في كل حاجة، مفيش حاجة بتأثر فيك. وعلشان تحافظ على الصورة دي، بتتجنب إنك تتكلم عن أي حاجة ممكن تبينك ضعيف أو محتاج لدعم.
شوفت ناس قبلك حاولوا وفشلوا: ممكن تكون اتفرجت على حد حاول يعبر عن نفسه واتعرض لسخرية أو تجاهل، فقلت لنفسك: "مش عايز أكون في نفس الموقف"، وقررت إن السكوت أحسن.
الخجل وعدم الراحة في المواقف الاجتماعية: يمكن بطبيعتك مش بتعرف تعبر بسهولة، وبتحس إنك مش مرتاح لما تتكلم عن نفسك. بتحس بتوتر، أو بتحاول تلاقي الكلمات المناسبة بس مش بتقدر، فبتقرر توفر على نفسك المجهود وتسكت.
كل دي اسباب ممكن تمنعك من التعبير عن نفسك بس السؤال هو: هل فعلاً الكتمان بيحميك؟ ولا ممكن لو جرّبت تتكلم وتعبرعن نفسك تكتشف إن الدنيا أبسط مما كنت فاكر؟
لو حاسس إنك مش مرتاح في الكلام عن نفسك أو بتتردد قبل ما تعبر عن رأيك، ده طبيعي ومش معناه إنك مش قادر، لكن محتاج شوية تمرين عشان تبقى أكثر ثقة وقدرة على التعبير عن ذاتك. هقدملك دلوقتي 8 افكار تساعدك تبدأ تتكلم وتعبر عن نفسك اكتر، وعشان نخلي كل فكرة عملية هقدمها في صيغة مشكلة وحل وهربطها بالتحدي او الخوف المقابل ليها.
1. مش عارف تبدأ منين؟ جرب مواضيع بسيطة وآمنة
لو عندك رهبة من الكلام عن نفسك، ممكن تبدأ بحاجة بسيطة ومش شخصية قوي، زي:
رحلات وإجازات رحتها.
هواياتك وحاجات بتحب تعملها.
مواضيع عامة في مجالك أو أي حاجة تهمك.
رأيك في مواضيع يومية من غير ما يكون عندك قلق إن رأيك هيكون غلط.
لما تبدأ تحط الحاجات دي في كلامك بشكل طبيعي، هتلاقي نفسك بتتكلم بثقة أكتر بدون تفكير مفرط، وكمان هتكون مطمن اكتر لأنك بتتكلم عن اهتماماتك والمعلومات دي مافيهاش اى شئ يحمل مخاطرة ولا صواب وخطأ.
2. مش عارف تشارك إيه؟ حدد مواضيعك مسبقا
الثقة في التعبير عن الذات مش معناها إنك تحكي كل حاجة لأي حد، لكن المهم إنك تختار إيه اللي ينفع يتقال وايه الخطوط الحمراء اللي مش ممكن تتكلم فيها غير مع اشخاص مقربين جدا بتثق فيهم. جرب تحدد بعض المواضيع الاساسيه اللى تقدر تتكلم فيها براحتك مع اى شخص حتي لو بتقابله لأول مرة. مواضيع زى:
ليه بتعمل الحاجة اللي بتعملها؟ او إيه اللي بيميزك فيها؟
رأيك في نفسك، وإزاي شايف تقدمك أو تطورك.
اهتماماتك وحاجات بتحب تعملها في وقت فراغك.
مواقف حصلت لك في حياتك، سواء كانت حلوة أو فيها شوية إحراج.
المواقف الشخصية بتخلي الناس يقربوا منك اكتر لانهم بيحسوا انك طبيعي وبتمر بمواقف هما كما بيمروا بيها وحاول تلاحظ ردود فعل الناس لما تتكلم معاهم بالشكل ده وهتلاقيهم بدؤا هما كمان يتكلموا ويعرفوك اكتر عن حياتهم.
لما تبدأ تتكلم عن المواقف الشخصية دي، هتلاقي إنك مستريح أكتر في التعبير عن نفسك بدون توتر وهيبدأ يتكون جواك انطباع عن نفسك انك شخص اجتماعي واللى بدورة هيعزز ثقتك فى اسلوبك وطريقة تعبيرك عن نفسك.
3. مش قادر تكون روابط شخصية في شغلك؟ قلل الرسميات شوية.
التواصل مع الناس مش لازم يكون رسمي أو متعلق بالشغل طول الوقت، خد خطوة بسيطة وحاول تعرف عن زملائك في العمل بعض المعلومات الشخصية ولكن بعد ماتكون بدأت تشارك معاهم معلومات عن نفسك لان ده بيديلهم احساس بالامان عشان هم كمان يتكموا ويشاركوا عن نفسهم بنفس القدر. حاول تعرف عنهم حاجات زي:
اهتماماتهم أو هواياتهم.
ازاي بيقضوا وقت فراغهم أو حياتهم برا الشغل.
حاجات مميزين فيها او نجاحات حققوها.
خلي بالك ان فئه كبيرة من الناس بتسمع بودكاست وكون الأسئلة جزء من اي حوار ناجح مش هتلاقي حد بينزعج ابدأ من الأسئلة الا اذا كانت فى مواضيع حساسة. غير كده حاول تتخيل نفسك في حلقة بودكاست وعندك فضول واهتمام تعرف الشخص اللى قدامك اكتر ودي حاجه الناس بتحبها وتقدرها لانها بتحسسهم بالقيمة والإهتمام.
لما اللى قدامك هيتكلم هيكون هو كمان عنده فضول يعرف عنك اكتر وهنا هتكون فرصة تعبر فيهها عن نفسك انت كمان وتستمع بحوار شخصي وتكون علاقات فى مكان العمل.
4. مش قادر تحدد اسلوبك؟ دور على شخص بيعرف يعبر عن نفسه وتعلم منه.
بص حواليك، أكيد فيه حد بيعرف يتكلم عن نفسه بثقة وبساطة، جرب تلاحظ:
إزاي بيتكلم عن نفسه بدون توتر أو مبالغة؟
إيه نوع المعلومات اللي بيشاركها؟
إمتى بيختار يشاركها؟
جرب كمان تقارن بين حد بيتكلم براحة وحد بيكون متحفظ جدًا، واسأل نفسك: مع مين بتحس براحة أكتر؟
5. مش واثق في نفسك؟ اتكلم عن مميزاتك ونقاط قوتك.
غريبة صح؟ ايوه لما تتكلم عن مميزاتك ونقاط قوتك وقراراتك الناجحه هتكون بتعزز من حديثك الداخلي وثقتك في نفسك وانت مش واخد بالك. الكلام عن نفسك مش غرور، بالعكس، ده بيديلك إحساس بالقوة والثقة. جرب تتكلم عن:
الحاجات اللي بتعملها كويس وبتحس إنك مميز فيها.
الحاجات اللي عايز تطورها في نفسك وإزاي بتشتغل عليها.
أي نجاحات أو تجارب فادتك في حياتك.
لما تبدأ تشوف نفسك من زاوية إيجابية وتعبر عنها هتقدر تظهر نفسك اكتر وهتحصل علي تقدير واهتمام اكبر من الناس وده بيزيد ثقتك وبيثقل شخصيتك والناس اللي حواليك هتلاحظ ده بسهولة.
6. بتخاف تظهر بأخطائك؟ اتكلم عن اللى اتعلمته من الخطأ.
الثقة مش معناها إنك معندكش أخطاء، بالعكس، الناس اللي عندهم ثقة بيعرفوا يعترفوا بأخطائهم ويتعلموا منها، وبما ان الاخطاء جزء اساسي من تجربتك الشخصية فمن المهم انك تعبر كمان عن الجزء ده من نفسك، جرب:
تحكي عن موقف غلطت فيه وإزاي تعاملت معاه.
تشارك الدروس اللي استفدتها من تجربة او محاولة فاشلة بدل ما تحس بالإحراج.
تركز على الحلول بدل ما تفضل تفكر في المشكلة نفسها.
لما تبدأ تشوف الأخطاء كجزء طبيعي من حياة كل انسان هتبطل تحس بالخوف او الخجل من مشاركتها، بالعكس الناس بتحبك اكتر وبيشوفوا جزء من نفسهم في تجربتك. انا مرة كنت بتعلم فن الخطابة وسمعت نصيحة مٌلهمة جدا بتقول “ الناس هتحترمك لما تتكلم عن انجازاتك وهتحبك لما تتكلم عن فشلك” فكر فيها شوية.
7. حاسس إن رأيك مش مسموع؟ اتكلم بأسلوب واضح ومفتوح للنقاش.
بدل ما تقول رأيك كأنه حقيقة مطلقة، جرب تخليه مفتوح للحوار، زي:
بدل ما تقول: "الموضوع ده غلط"، جرب تقول: "أنا عندي وجهة نظر مختلفة، شايف إن..."
بدل ما تقول: "ده مش بيحصل أبداً"، جرب تقول: "نادراً ما بيحصل، بس ممكن يكون في استثناءات".
الطريقة دي بتخلي كلامك حكيم ومتوازن، وفي نفس الوقت بتخلي الناس تتقبل رأيك بسهولة وبتفتح مجال للنقاش وطرح معلومات اكتر عن الموضوع من كل الأطراف. الاسلوب ده بيحميك من التعنت في الرأي اللى ممكن يكون اصلا غلط وتعرض نفسك للإحراج. قدم رأيك في اى موضوع على اعتبار انه وجه نظر قابلة للنقاش وقابلة للخطأ والصواب.
8. مش عارف امتي تكمل وامتي توقف؟ جرب التوازن.
التعبير عن الذات مش معناه إنك تفضل تتكلم وتتعمق فى حوارك مع اي شخص، مهم يكون عندك توازن وتعرف امتي تكمل وامتى توقف وعشان تعمل ده جرب تقرأ رد فعل اللي قدامك:
لو لقيته بيشارك برضه، استمر في الكلام لان دي اشارة انه مهتم.
لو لقيته مش مستعد يشارك، خفف الكلام واختصر الموضوع وابدأ من جديد في وقت تاني لان ممكن يكون اللى قدامك فكرة مشغول بحاجة تانية او مزاجه مش كويس.
الخلاصة
التعبير عن نفسك مش حاجة صعبة، لكنه مهارة بتتحسن بالممارسة. كل خطوة صغيرة هتاخدها هتزود ثقتك بنفسك، وهتلاقي نفسك بتتكلم براحة أكتر من غير تردد. لو اتعودت تتكلم وتعبر عن نفسك في المواقف الإجتماعية البسيطة دى هتستمتع اكتر بوجودك مع الناس وهتبدأ تشعر بقيمة رأيك ومنظورك الشخصي وده هيشجعك تتكلم حتي في اصعب المواقف، وهتعرف تظهر نفسك وتعبر عن اعجابك او رفضك لسلوكيات الناس معاك باسلوب دبلوماسي وهتكتشف ان من اكبر الأخطاء اللي الانسان بيعملها هو السكوت والانطوائية لانهم بيقدموا للآخرين انطباع انه انسان ضعيف وسلبي مالهوش شخصية.
جرب من اليوم تعبر وتفصح عن ذاتك، وافتكر دايمًا إن صوتك مهم، ورأيك يستحق إنه يتسمع!
انتظر مقال جديد أسبوعياً، سجل بريدك الإلكترونى عشان يوصلك بمجرد نشره.
لحجز جلسة كوتشنج اضغط هنا
أريد أن أسأل سؤالاً: أنا عندما أرى أي أحد من اخواني يتكلم في أمر ما يلقي محاضرة مثلا او خطبة جمعة أو غيره، اقول لنفسي لا استطيع فعل ذلك ، أو كيف أفعل ذلك ، وأخاف من التحضير والكتابة والإلتزام بها ، وأيضا من التحديات مسألة اللغة العربية فأنا أريد أن أتكلم بها ،ولكن الحصيلة اللغوية لا تسعفني فما العمل جزاكم الله خيرا ؟
جزاكم الله خيرا ، مقال جميل