توقف فورا عن التضحية من اجل الآخرين
!لو عايز الناس تهتم بيك وتحبك، لا تهتم بيهم ولا تحبهم، في شئ اهم
عمرك ضحيت بنفسك عشان حد تاني؟ لو الإجابة "آه"، ممكن تكون من الناس اللي بيرضوا غيرهم على حساب نفسهم، اللي دايمًا بيحطوا سعادة الناس قبل سعادتهم، خايفين من الرفض أو الكره، وعندهم صعوبة يقولو "لأ". بتحس إنك لازم تكون متاح لأي حد في أي وقت. لو بتعمل كده عشان الناس تحبك العكس تماما هيحصل! انا كمان كنت بعمل كده لحد ما اتأكدت اني غلطان.
كنت بحاول اخلي نفسي "مفيد" عشان محدش يرفضني أو يستبدلني بسهولة.
حاولت أتعلم حاجات كتير عشان أكون دايمًا عندي حلول لما حد يلاقي نفسه في مشكله اكون انا الحل، عشان كنت فاهم اني لما اساعده هيحبني ويقدر وجودى اكتر. بس المشكلة إني ما قدرتش احب نفسي ولا أقدّرها كفايه لاني كنت دايما بنتظرالحب والتقدير من الناس.
وانا صغير اتعلمت بشكل ما إن قيمتي بتتحدد على حسب اللي أقدر أقدمه. كنت بقدم كتير. كنت لطيف بزيادة، متاح معظم الوقت، عايش على هوا الاشخاص اللى عايز احافظ عليهم، شايفهم اهم مني، وقتهم اغلى من وقتي، احتياجاتهم اولي من احتياجاتي. كنت عايزهم يحبوني ويقدروني ويقدموا لي شويه من وقتهم واهتمامهم. النتيجه؟ خيبة امل.
المشكلة مش في الناس. المشكلة كانت فيا أنا. توقعاتي كانت في غير محلها.
مش كل الناس هتعاملك بالمثل. فيه ناس هيكلموك بس لما يكونوا محتاجين حاجة، ولما ياخدوها، هيختفوا كأنك ماكنتش موجود. مش كل الناس هتهتم بيك زي ما إنت مهتم بيهم. ومش كل الناس هتحبك لما تقدم لهم اكتر. بالعكس اغلب الناس هتستضعفك وهتشوفك مجرد ورقة لعب مضمونه يلعبوا بيها وقت ما يكونوا عايزين، لان افعالك الطيبه وكرمك الزائد بيقولهم انك محتاجهم اكتر ما هم محتاجينك.
عارف انك ممكن تقولي بس يامحمد الايثار وتقديم مصلحة الغير على المصلحة الشخصية يعتبر عمل خير.
ده كلام صحيح وانا متفق معاك انما له شروط اذا لم تتوفر هتبقي بتظلم نفسك وساعتها لن تؤجر عليه بحسب الشروط اللي حددها الامام ابن القيم للإيثار لما يكون بين الناس، علشان يبقى مقبول ومش مكروه، وهي:
لا يضيع عليك وقتك.
لا يفسد عليك حالك.
لا تسبب لك اي ضرر.
لا يؤثر سلبا على دينك.
لا يكون سبب في منعك عن خير كان ممكن يعمله.
لا يمنع عنك فرصة رزق أو بركة كانت جاية لك.
يعني تقديمك لنفع الغير علي نفع نفسك هو فعل جميل ولكن بشرط انك ما تخسرش اي شىء في المقابل، غير كده هيبقي عمل مكروه. علشان كده المبالغه في الاهتمام بالناس والتضحيه علشانهم ممكن يكون سلوك خداع لصاحبه لانه بيظهر علي انه كرم وطيبه وهو في الاصل سوء تقدير لان الناس مش هتعيش بتوقعاتك ولا هيعوضوك عن خسارة انت اللي اخترتها بكامل ارادتك وده هيخليك تشوف المشكله في الناس بس المشكله الحقيقية عندك.
في مشهد عبقري في مسلسل Suits، هارفي بطل المسلسل بيقوم بدور محامي داهيه عنده قدرة عجيبه على فهم سلوك الاخرين والتنبؤ بخطواتهم. موهبتة بتخليه يقدر يكسب كل القضايا. هارفى رغم ذكاءة وشخصيته القويه اللى بتخلى الناس تعمله الف حساب كان عنده جانب انساني، كان بيشوفه ضعف ومش عايز يظهره لحد حتي اقرب الناس. هارفي كان بيهتم جدا لأمور الناس المقربين منه وكان بيعمل المستحيل عشان يساعدهم ويحميهم، لكن كان بيعرف يظهر العكس تماما. اه المشهد.. كنت قرب انسي.. المشهد اللى بحكي عنه حصل بين هارفى ومديرته جيسكا في حضور كل الموظفين.
جيسكا : ان بتتظاهر انك مش مهتم بالناس بس انت مهتم. انت بتهتم بالناس اللى بتشتغل معاهم، بتهتم بالناس اللى بتشتغل عشانهم، بتهتم بكل واحد من عملائك. بس انت رافض تخلى الناس تعرف!
هارفي : عندك سؤال؟
جيسكا : ايوه، انا بس عايزه اعرف ليه؟
هارفي : --- (صمت) ---
جيسكا : مش لاقي اجابة؟ انت محرج!
هارفي : لأ
جيسكا: خايف؟
هارفي : لأ
جيسكا : طيب قولنا ليه؟
هارفي : غيري الموضوع.
جيسكا : مش معقول! ايه اللى دمرك للدرجة دي؟ الاهتمام بالناس بيخليك ..
هارفي بيقاطع جيسكا : ضعيف. اول ما يعرفوا ان الشخص مهتم بيهم بيدوسوا عليه.
انا كنت فاكر انى لو عايز حد يحبني يبقي لازم افضل اقدمله الحب والاهتمام حتي لو على حساب نفسي، بس اكتشفت ان ده ممكن يكون ضعف وبيؤدي لنتائج عكسية، وعارف ان ناس كتير ممكن تختلف معايا، لكن فيه بديل عملي بدأت استخدمه في كل علاقاتي الشخصيه وحقيقي غير المعادله تماما لصالحي.
لو عايز الناس تهتم بيك وتحبك، لا تهتم بيهم ولا تحبهم. طيب تعمل ايه؟ إحترمهم.
اولا انت مش هتحب كل الناس، لان الحب ده له تفاصيل كتير مستحيل تكون موجوده في كل الناس. اذا كان ده الحال معاك فهو كمان عليك. مستحيل كل الناس تحبك. مش عشان انت شخص لا يستحق الحب. كل ما في الموضوع انك مختلف عنهم لدرجة ممكن تخليهم ينفروا منك زي ما انت كمان ممكن تنفر منهم. لكن الاحترام بيقرب المسافات واقدر كمان اقول انه بيلطف القلوب وبيعلي قيمتك في نظر كل اللى هتتعامل معاهم.
احترم الناس واجبرهم على احترامك بنفس القدر.
احترم خصوصيتهم، احترم وقتهم، احترم افكارهم، احترم تجاربهم الشخصية، احترم مشاعرهم، احترم اختيارتهم وقرارتهم، احترم اختلافهم، احترم احلامهم ورغباتهم، احترم ضعفهم، احترم نجاحهم. احترم حق كل انسان يتصرف بالشكل اللى هو عايزه طالما مش بيأذيك في شئ.
اغلب الخلافات بتبدأ من الشخص اللى بيحكم على غيره، اللى شايف رأيه هو الاهم والاصح، ان كل الناس لازم تشوف اللى هو شايفه، وتتصرف بحسب منطقه. لما تبدأ تحترم الناس بالشكل ده هتكون بتظهرلهم عمليا قد ايه انت بتقدرهم وازاي شايفهم. هتكون بتقدملهم اغلى حاجه محتاجينها، الحاجه انهم يكونوا علي طبيعتهم معاك لانهم عارفين انك بتحترم اختلافهم ومش مستني منهم اللى يخليك تحكم عليهم.
صعب تظلم نفسك وانت بتحترم الناس، بس ممكن جدا تظلم نفسك وانت بتحاول ترضيهم وتكسبهم طول الوقت.
احترام الناس مش بياخد من وقتك ولا مجهودك ولا فلوسك. احترامك للناس بيظهر لما تعامل مديرك زي ما بتعامل عامل النظافه، لما تعامل اللى ظلمك زي اللى احسن اليك. الاحترام بيحافظ علي الود حتي بعد انتهاء العلاقات، الاحترام مش هيمنعك تاخد حقك، ولا هيمنعك ترفض تعمل حاجه انت مش عايزها ولا هيمنعك تقطع علاقتك بشخص ما لما تقرر انه غير مناسب ليك لانك زي ما بتحترم الناس من حقك عليهم احترامك بالمثل.
إبدأ باحترامك لذاتك ورفع معاييرك الشخصية
رأيك مهم، وقتك غالي، طاقتك مش ببلاش، علمك وخبرتك مش سلع رخيصه، قصتك وتجربتك الشخصيه مش اقل من قصة نلسون مانديلا ولا احمد زويل، مشاعرك حقيقيه، وقرارتك انت حر فيها، ومن حقك تكون على طبيعتك. الناس لازم تحترم كل ده فيك ومسؤوليتك هي تخلي احترامهم ليك شرط لبدء التعامل واستمرار العلاقة. لو حصل تجاوز خد موقف واتكلم ووضح حدودك للطرف الاخر وصدقني لو احترم حدودك هتكسبه، ولو بعد عنك هيخسرك. باختصار لو الاحترام متبادل كمل.
أنا بحاول وبتعلم كل يوم أحط حدود فى كل تعاملاتي حتى لو كان صعب فى بعض الاوقات. بتعلم أفلتر مين اللي يستاهل يكون في حياتي ومين اللي مايستاهلش اكون في حياته. اتعلمت اشوف نفسي غالي في نظري واعيش كل لحظه وانا مقدر قيمتي. مش غرور ولا تعالى ده حقي تجاه نفسي وبشوف ان كل انسان غالي وكل انسان له قيمه كبيرة. مش ممكن اقلل من نفسي عشان ارضي حد ومستحيل اقبل من حد يقلل من نفسه عشان يرضيني. مش مستعد اخسر عشان اكسب حد ومش مستعد اكسب على حساب حد بيحاول يساعدني. فى حاجه جوايا بتقولى ان ده شئ بشع لاننا كلنا عباد لله ومافيش حد فينا افضل ولا اقل من غيره الا بمدى طاعته وقربه من ربنا. حبنى او اكرهنى انا بحترمك وبقدرك فى كل الحالات لان ربنا كرمك وده مايمنعش خالص ان لو ليا عندك حق هاخده واقولك سلام عليكم، ولو قررت اساعدك هعمل ده بعد ما اتأكد اني مش هظلم نفسي لاني مسؤول عنها وهتحاسب عليها اولا.
الخلاصه، خلى الاحترام هو العملة الاساسية في كل علاقاتك الاجتماعية واستخدمه كافلتر تشوف من خلاله الناس وتعرف بسهوله ترسم شكل العلاقات اللى تنفع تكمل وتحط حد للعلاقات اللى ما تنفعش. ماتستناس الناس تحبك او تهتم بيك. لكن عرفهم باظهار احترامك ليهم انهم كمان مطالبين يعاملوك بالمثل من اول لأخر يوم وانك مش هتقبل اقل من كده.
حب نفسك وطورها وزكيها وساعد غيرك من قوة وليس ضعف، ساعد بغني وليس احتياج وعمرك ما هتندم علي خير عملته ولا هتستني من حد يعوضك عن حاجه لانك ماخسرتش حاجه من نفسك.
انتظر مقال جديد أسبوعياً، سجل بريدك الإلكترونى عشان يوصلك بمجرد نشره.
لحجز جلسة كوتشنج اضغط هنا
الله ينور عليك، نفسي اعرف اتكلم واعبر عن داخلي مثلك
السلام عليكم يا ريت لو تكتب بالفصحى وليس بالعامية او قلل العامية