تفكيك أسرار تعلم الإنجليزية: كيف يمكن للجميع التحدث بطلاقة؟
قضيت سنة كامله عشان اعرف ازاى اتعلم اللغة الإنجليزية، وقضيت سنة وانا بتعلم.
المقال ده هيوفر عليك السنة الأولى.
انا اتعلمت تعليم حكومى مدرسة وجامعة وياما انضربت فى المدرسة فى حصة الانجليزى عشان كنت مش بعرف احفظ الكلمات ولا بقدر افهم الأزمنة و القواعد النحوية. اسوء نتيجة فى كل المواد اللى درستها لحد ما خلصت الثانوية العامه مكانتش فى الكيمياء ولا الرياضيات اسوء درجات كانت فى الانجليزى.
سنة ٢٠١١ فى اخر سنة فى الجامعة قررت اخيرا انى لازم اتعلم اللغة عشان اعرف الاقى شغل كويس.
بدأت اسأل نفس السؤال اللى ناس كتير بيسألوه " ازاى اتعلم اللغة الانجليزية؟" دورت على النت لقيت الآف الكورسات، دخلت مكتبة لاقيت عشرات ومئات الكتب ده غير مراكز تعليم اللغة اللى فى كل حتة فى البلد. اشتريت كتب وكورسات وقعدت احفظ كلمات واتعلم قواعد حوالى سنة كامله، والنتيجة انى معرفتش اتكلم اللغة زى ما انا عايز.
رجعت تانى اسأل نفس السؤال "ازاى اتعلم اللغة؟"
لما عرفت الاجابة الحقيقية للسؤال ده قدرت اتعلم اللغة واتكلمها بثقة فى اقل من سنة وده شجعنى ادخل على المرحلة الثانية وهى اتقان اللغة والحمدلله دلوقتى بقدر اعبر عن افكاري واوصل وجهة نظرى واشرح مواضيع معقدة باللغة الانجليزيه زى ما بقدر اعمل ده باللغة العربية.
العائق الأكبر اللى ممكن يقابل اى حد بيتعلم اللغة هو الغرق فى عملية حفظ الكلمات ودراسة القواعد.
فى دلوقتى الأف الكورسات لتعلم اللغة، ومئات ويمكن الآف القنوات التعليمية على يوتيوب بتقدم محتوى مجانى، ده غير حسابات السوشيال ميديا والتطبيقات المجانية اللى على بعد ضغطة زر. ده معناه انك مش مستنى منى بس انى ادلك على كورس او ارشحلك حساب او تطبيق تتعلم منه لأنك على الأغلب جربت ده بالفعل وموصلتش للنتيجة اللى انت عايزها.
انت عايز تعرف محتاج تعمل ايه تحديدا عشان تتكلم اللغة فى أسرع وقت. وانا مش هخيب ظنك وهقدملك المعرفة والادوات العملية اللى تساعدك تحقق هدفك فى اسرع وقت.
فى الاول محتاجين نعرف ايه اللى احنا بنعمله غلط بيخلينا مش قادرين نتكلم اللغة كويس رغم كل المصادر المتاحة حوالينا من كورسات وفيديوهات تعليمية اغلبها مجاني.
وهم التعلم
اسهل حاجة ممكن تعلمها وانت فاكر انك بتتعلم اللغة هو انك تحضر كورس اونلاين او تحفظ كلمات وتدرس القواعد النحوية، لكن لو قعدت تعمل ده سنين انت مش هتبقى بتتعلم اللغة. المعنى الادق والاصح للى انت بتعمله هو انك بتتعلم عن اللغة. الفرق كبير.
مثال بسيط عشان تفهم الفرق بين التعلم عن اللغة وتعلم اللغة.
لو قررت تتعلم التصوير ودخلت حضرت فيديوهات بتعلمك استخدام الكاميرا واساسيات التصوير انت هنا بتتعلم عن التصوير، لكن لما تجيب كاميرا وتبدأ تصور ويطلع معاك صور كتير بايظه فا تقعد تغير فى اعدادات الكاميرا وتجرب تصور من زوايا مختلفة ويبدأ يطلع معاك كام صورة عدله انت كده بتتعلم تصوير.
وانت بتحفظ مفردات وتدرس قواعد اللغة انت هنا بتتعلم عن اللغة، لكن لما تبدأ تتكلم وتهته وتنطق الكلام بصعوبه وتقول جمل مش مفهومه وبعدين تفضل تحاول تتكلم وتحرك لسانك لحد ماتبدء تدريجيا تظبط مخارج الحروف و يطلع معاك كام جمله صح انت هنا بتتعلم اللغة.
التعلم عن الشئ هو جمع قدر كافى من المعلومات بهدف البدء فى الممارسة.
تعلم الشئ هو الممارسة العملية بهدف تكوين العادة واكتساب المهارة.
فى شخص اتكلمت معاه من فتره وعرفت انه بقاله ٣ سنين بيحاول يتعلم اللغة ومع ذلك مش بيعرف ينطق جملتين على بعض. رغم كمية المفردات اللى حفظها. كل اللى كان بيعمله فى الـ ٣ سنين هو انه كان بيتعلم عن اللغة مش بيتعلم اللغة. هو ده المقصود بوهم التعلم.
عشان كده لازم السؤال يتغير من كيف اتعلم اللغة الى كيف اتعلم التحدث باللغة، هنا انت هتبحث عن اجابة محددة لتحقيق هدف محدد وهو التحدث باللغة.
كيف تتعلم التحدث باللغة الإنجليزية
الطفل بيتعلم المشي بمحاولات المشئ، والكلام بمحاولات الكلام. الفنان بيتعلم الغناء بالغناء، والتمثيل بالتمثيل، والرسم بالرسم. الطبيب بيتعلم الجراحة بالجراحة، والام بتتعلم التربية بالتربية، والكاتب بيتعلم الكتابة بالكتابة، ولاعب الكرة بيتعلم بلعب الكرة، وانت لو عايز تتكلم لغة جديدة لازم تتكلم اللغة الجديدة. اتكلم تتعلم.
مش ممكن الطبيب يعمل عملية جراحية قبل ما يتعلم عن الجسم البشري ويدرب بشكل عملى فى حصص التشريح ويحصل على شهادة اعتماد تعرف الناس انه مر بالمراحل دى كلها واجتازها بتفوق. لأنه لو فضل طول عمره يتعلم عن الجسم البشري بدون تدريب عملى عمره ما هيقدر يحصل على لقب طبيب ولا هيقدر يعمل عملية جراحية واحده.
سر التعلم الفعال هو تحقيق التوازن بين جمع المعلومات النظرية واستخدامها عملياً
ضرورى تتعلم عن اللغة وتحفظ مفردات ومصطلحات تعبيرية لكن ايه لزمتها لو ما استخدمتهاش كل يوم بشكل عملى، ايه لازمتها لو مش بتحرك بيها لسانك وتتواصل بيها مع غيرك! السؤال هنا ازاى تحافظ على التوازن بين التعلم عن اللغة وتعلم اللغة؟ فى تقنية بسيطة هتساعدك تصب تركيزك على اهم عنصر فى تعلم اللغة.
تقنية التدريب المتعمّد
التقنية دي اتشهرت بفضل عالم النفس أندرس إريكسون، وبتقوم على إنك تركز على جزء معين من المهارة وتاخد ملاحظات عشان تتعلم من أخطائك وتطوّر نفسك بسرعة. لازم تكون مستعد تدفع نفسك شوية برا منطقة الراحة لانك هتغلط كتير اوى لكن هو ده الهدف اصلا من التدريب المتعمد هو انك تغلط كتير وبسرعة عشان تقدر تتعلم اسرع من اخطائك وتركز على تحسين نقاط ضعفك.
الأجزاء المهمه فى تعلم اللغة هى التحدث، الاستماع والكتابة.
التركيز على التدريب العملى لازم يكون له الأولوية لان الاخطاء اللى هتعملها فى المرحلة دى هو اللى هيساعدك ترسم الخطة الدراسية وتركز على حفظ المفردات والقواعد النحوية اللى انت محتاجها عشان تمارس بشكل افضل. وضرورى تقسم وقتك من نفس المنطلق.
مثلا لو قررت تخصص ١٠ ساعات لدراسة وتعلم اللغة اسبوعيا يبقى ٣ ساعات انت بتدرس قواعد نحوية وتحفظ مفردات و ٧ ساعات انت بتتكلم وتمارس اللى انت درسته وحفظته من قواعد ومفردات. التقسيمة ده من نموذج التعلم الفعال اللى شرحته بالتفصيل فى فيديو على يوتيوب تقدر تحضره من هنا
ممكن تشوف ان ٣ ساعات مش كفايه وانك محتاج وقت اكتر من كده عشان تدرس وتحفظ كلمات، وممكن تكون شايف ان الممارسة محتاجة وقت اقل من ٧ ساعات لكن هشرحلك ليه.
اللى بيحدد جودة الدراسة مش الوقت، يعنى مش الـ ٣ ساعات انما الدافع والتركيز والرغبة المللحة فى الاستفاده من اللى بتدرسة. الدافع والرغبة فى الدراسة هتزيد جدا لما تبقى عارف انك وراك ٧ ساعات من الممارسة وان قدرتك على تحسين الممارسة مرهونه بجودة الدراسة فى الـ ٣ ساعات، ده بيخلى تركيزك زى اليزر وانت بتدرس وبتحفظ المفردات.
اللى تقدر تتعلمه فى الـ ٣ ساعات وانت فى الحاله العقلية والنفسية دى، غيرك مش بيقدر بتعلمه فى ٣ أيام.
لما بتمارس ٧٠٪ من الوقت انت بتغلط اكتر فى وقت اقصر والاخطاء دى بتعرفك انت محتاج تركز على ايه اكتر وانت بتدرس، مره تكتشف انك محتاج تعزز مفرداتك فى موضوع معين، ومره تكتشف انك محتاج تركز على قاعده نحوية بتسخدمها فى اغلب كلامك، ومره هتكتشف كلمات معينة بتتلخبط فيهم عشان نطقهم قريب من بعض فتقرر تركز على فهم الفرق وتحسين النطق، وهكذا.
عشان تقدر تعمل ده وتستمر عليه، ضرورى يكون عندك خطة وادوات تساعدك كل يوم.
هقدملك دلوقتى نفس المبادئ اللى اتبعتها فى تعلم اللغة الانجليزية من خلال خطة قابلة للتعديل حسب تفضيلاتك الشخصية.
خطة تعلم اللغة الإنجليزية
الخطة عبارة عن ثلاثة اقسام:
١. الإعتماد على مصدر اساسي لدراسة وفهم اللغة والتركيز عليه.
٢. استخدام اداه سهلة وفعالة لتخزين المفردات فى الذاكرة بعيدة المدى.
٣. استخدام ٣ وسائل للتدريب اليومى المتعمد لكل من التحدث، الإستماع والكتابة.
١. الإعتماد على مصدر اساسي لدراسة وفهم اللغة والتركيز عليه.
محاولة التعلم من اكثر من مصدر فى نفس الوقت بيسبب التشتت وبطئ عملية التعلم.
سواء كنت هتسجل فى مركز تعليمى او هتتعلم من اليوتيوب او هتشترى كورس، حاول تحدد وتختار مصدر واحد تتعلم منه كل اللى تقدر عليه بعدين تفكر تنتقل لمصدر جديد. استكشف المصادر المتاحة ونصيحتى ابحث عن كورسات اونلاين واتعلم من أصحاب اللغة عشان تبدء تفكر بالانجليزى من اولها واللى هيساعدك تعمل ده هو انه فى كلمات كتير مش هتفهمها وهتضطر تدخل تترجمها وتفهم معناها والخطوات البسيطة دى بتساعدك تفتكر اللى بتتعلمه اسرع - التقنية دى اسمها التعلم النشط.
لو محتار فى كورس اونلاين مناسب لمستواك، برشحلك الكورس اللى اتعلمت منه كل اساسيات اللغة من قواعد ومفردات. الكورس فوق الممتاز وتفاعلى جدا والميزة الاهم انه مجاني تماما، الكورس اسمة English For You وهو متاح على يوتيوب وهو عبارة عن مستويات وبيبدأ معاك من الصفر والاهم انك تقريبا مش هتحتاج تترجم الكلام لأنك هتشوف صور تعبر عنه.
تقدر تحضر الكورسات مجاناً على يوتيوب من هنا ونصيحة منى حاول تحفظ كل كلمه هتسمعها فى الكورس لان الكلمات المستخدمة هى الكلمات الاساسية والاكثر استخداما فى اللغة وهتقابلك كتير.
٢. استخدام اداه سهلة وفعالة لتخزين المفردات فى الذاكرة بعيدة المدى
المفردات هى العمود الفقرى للغة.
كل ما قدرت تزود مخزون المفردات عندك كل ما قدرت تفهم اللغة اسرع وتلاقى كلمات تعبر من خلالها عن افكارك وتستخدمها فى المحادثات وبعد فترة هتقدر تستشف معانى الكلمات الجديدة الغريبة من السياق بالأخص كل ما تسمعها او تقرأها كتير اثناء الممارسة.
عشان تحفظ المفردات اسرع انت محتاج تسمع نطقها الصحيح، صورة دلالية على المعنى، امثلة توضيحية لكيفية الاستخدام، ومراجعة المفردات اللى بتتعلمها من وقت للتانى عشان تثبت فى الذاكرة - اتكلمت عن تقنيات الحفظ بالتفصيل فى مقال سابق ممكن تقرأه من هنا.
افضل تطبيق هيساعدك تعمل كل ده وبستخدمه من سنين الى وقتنا الحالى هو تطبيق WordUp تقدر تستخدمه على تليفونك بشكل مجانى لترجمة وحفظ المفردات وافضل مافى التطبيق هو الصور والفيديوهات والامثلة اللى بيقدمها لكل كلمة بتحاول تفهم معناها وكمان بيساعدك تستعرض المفردات اللى انت بتتعلمها بشكل مستمر لحد ما تتأكد انك اتعلمتها وحفظتها تماماً.
٣. استخدام وسائل للتدريب اليومى المتعمد لكل من التحدث، الإستماع والكتابة.
من اكبر التحديات اللى ممكن تواجهك اثناء الممارسة والتدريب على اللغة هو ان الناس اللى حواليك مش بيتكلموا اللغة ومافيش عندك فرصة للتحدث بشكل مباشر مع شخص متقن للغة، لكن المشكلة دى ليها حل.
هنستعرض ٣ وسائل عملية للتدريب العملى على استخدام اللغة.
١. التحدث
الهدف من التمرين هنا هو استخدام وتدريب اللسان وعضلات الفم على تحدث اللغة فى عدم وجود اشخاص.
كل المطلوب هو انك تقرأ بصوت مسموع كل يوم لمدة ١٥ - ٣٠ دقيقة. اختار موضوع انت مهتم به واقرأ عنه باللغة الانجليزية فى اى صيغة سواء كان كتاب، مقالات، او اخبار. فى صعوبات هتواجهك وهى المفردات الجديدة، وعدم معرفتك بطريقة النطق الصحيح. ده شئ ممتاز لانك هتضطر تحاول تعرف معناها ونطقها عشان تقدر تكمل قرأة وانت فاهم. انت كده بتتعلم.
زمان كنت مهتم بالسياسة فاخترت انى اقرأ الاخبار من موقع اخبار امريكى بصوت مسموع، التمرين صعب فى الاول ولكن مع التكرار بدأت الصعوبه تقل لانى اتعلمت معانى كلمات كتير ولسانى بدأ يتعود على النطق ومخارج الحروف، ثقتى فى نفسي بدأت تزيد واتحمست انى اتمرن اكتر على قراءة كتب كاملة باللغة الانجليزية.
اختار الموضوع اللى هتقرأ فيه بصوت مسموع وخلي التمرين ده جزء اساسى من يومك لان ده فى اعتقادى هو اسرع طريقة هتخليك تألف اللغة وتتكلمها فى زمن قياسي.
٢. الإستماع
الهدف من التمرين هنا هو تكرار الاستماع للنطق الصحيح، ومحاولة الفهم من سياق الحديث وتغذية العقل اللاواعى.
اسمع محادثات فى اللغة كل يوم لمدة ٣٠ الى ٦٠ دقيقة عن طريق البودكاست او الكتب المسموعة، او حتى مسلسلات اجنبى بالترجمه الانجليزية. و هنا هيقابلك تحدي كبير وهو انك مش هتفهم ٩٠٪ او اكتر من اللى بتسمعه. ده شئ ممتاز لان مخك هيضطر يشتغل اكتر عشان يلقط بعض الكلمات ويفهم بعض الجمل ومع التكرار مخك هيبدأ يربط تدريجيا بين اللى انت بتدرسه من مفردات وقواعد وبين اللى بتسمعه وهتبدأ تلاحظ انك بدأت تسمع كلمات مألوفه بتتكرر كتير وبعد شويه هتبدء تفهم جمل كامله وتعبيرات بتتكرر كتير.
فى الحالة بتاعتى كنت بسمع بودكاست فى القيادة اسمه Dose of leadership وكنت بحضر مسلسل Friends الكوميدى وكنت بعيد الحلقة ٣ او ٤ مرات عشان افهم ايه اللى بيضحك وكنت بضحك وبستمتع فى نفس الوقت اللى كنت بتعلم فيه.
مش مستغرب انى قابلت ناس كتير جدا حبوا اللغة واتعلموها من خلال المسلسلات الأجنبية الكوميدية.
مش مهم هتسمع ايه كل يوم، المهم تكون مهتم باللى بتسمعه ويكون فيه قدر من الترفيه اللى يعزز رغبتك فى التمرين ويشجعك تستمر عليه.
٣. الكتابة
الهدف من التمرين هنا هو تعزيز الحفظ وتنمية مهارة الكتابة باللغة الانجليزية
فى دراسات كتير اثبتت فاعلية الكتابة فى عملية التعلم الفعال والاحتفاظ بالمعلومات لفترة اطول فى الذاكرة. والتمرين ده هيكون جزء اساسى اثناء الدارسة للغة بالاخص من خلال الكورس لانك هتحتاح تكتب وتجاوب على بعض الاسئلة والتمارين، هتكتب المفردات وتدرب على القواعد النحوية. هتعمل كده ازاى؟
الكتابة ممكن تكون على ورق وممكن تكون ديجيتال.
استخدم دفتر مخصص للكتابة العشوائية اثناء محاولة حفظ المفردات والاجابة على الاسئلة والتمارين الخاصة بالكورس او حتى وانت بتكتب جمل من دماغك. الدفتر ده انت من الأخر بتتعلم وبتلعب فيه يعنى فى النهاية الكلام عشوائى وهيبقى فيه شخبطة كتير ومش هتحتاج تحتفظ به بعد ما تملى كل صفحاته. هو مجرد مساحة بتجرب وتتعلم فيها الكتابة وليس لتسجيل وتنظيم المعلومات.
استخدم التطبيق WordUp لكتابة وتسجيل المفردات الجديدة ومراجعتها وده تطبيق هيفضل معاك على تليفونك طول الوقت وهتقدر تراجع المفردات اللى بتتعلمها وانت فى مواصله او حتى وانت مستنى دورك فى طابور.
الكتابة مش تمرين منفصل بذاته لكنه جزء طبيعى اثناء دراستك للغه يعنى الوقت والمده المناسبة للكتابة هى نفسها الوقت والمده اللى انت هتخصصها لدراسة اللغة من خلال الكورس اللى هتختارة.
الخلاصة
تعلم اللغة او أى مهارة جديدة بيمثل تحدي كبير لكل الناس بدون استثناء بالأخص اثناء التدريب العملى. من الخطأ انك تظن ان قدرتك على التحدث باللغة الجديدة بتعتمد بشكل كامل على عدد المفردات والقواعد اللى انت بتحفظها. قدرتك على تعلم اللغة بتعتمد كمان وفى المقام الأول على تكرار محاولاتك للتحدث باللغة.
بإختصار: اتكلم. إغلط. إتعلم.
ااول مقال طويل اقراه واحس اني استفدت مرره شكارً
شكرا لك لجهودك حرفياً صرت الأفضل بالنسبة لي ويومي كله اقراء مقالاتك واشوف مقاطعك استمرر🩷